АСТАНАДА ХАЛЫҚАРАЛЫҚ КӨЛІК-ЛОГИСТИКАЛЫҚ ЫНТЫМАҚТАСТЫҚТЫ ДАМЫТУ ҮШІН 20 ЕЛДІҢ 230 КОМПАНИЯСЫН БІРІКТІРГЕН TRANSLOGISTICA KAZAKHSTAN 2026 КӨРМЕСІ БАСТАЛДЫ

БҮГІН, 2026 ЖЫЛҒЫ 14 ҚАЗАНДА, АСТАНАДАҒЫ EXPO ХАЛЫҚАРАЛЫҚ КӨРМЕ ОРТАЛЫҒЫНДА «КӨЛІК ЖӘНЕ ЛОГИСТИКА» АТТЫ 29-ШЫ ҚАЗАҚСТАНДЫҚ ХАЛЫҚАРАЛЫҚ КӨРМЕНІҢ – TRANSLOGISTICA KAZAKHSTAN 2026 КӨРМЕСІНІҢ САЛТАНАТТЫ АШЫЛУЫ ӨТТІ.

Көлік-логистикалық қызметтер мен технологиялар саласындағы Орта Азияның ең ірі мамандандырылған көрмесі мемлекеттік құрылымдар, дипломатиялық корпус, халықаралық салалық ұйымдар мен бизнес өкілдерін тағы да біріктірді. Үш күн бойы көрме кәсіби өзара іс-қимылды нығайтуға, халықаралық серіктестікті кеңейтуге және көлік-логистикалық инфрақұрылымды дамытуға бағытталған заманауи шешімдерді таныстыруға арналған алаң ретінде қызмет етеді.

Ресми ашылу салтанаты мемлекеттік органдардың, салалық бірлестіктердің және іскерлік қоғамдастықтың өкілдері қатысуымен өтті. Қатысушылар мен қонақтарға Жәнібек Жұмаұлы Тайжанов – Қазақстан Республикасының көлік вице-министрі; Мұратбек Мамытханұлы Маханов – Қазақстан Республикасының «Атамекен» Ұлттық кәсіпкерлер палатасы Басқармасының мүшесі, Басқарма Төрағасының орынбасары; Қанат Есмұханұлы Әлмағамбетов – KAZLOGISTICS Қазақстан көлікшілері одағы Төралқасының мүшесі, Төралқа Төрағасының орынбасары; Гүлзана Абдушарипова – көрменің іс-шаралар жөніндегі директоры құттықтау сөз сөйледі.

Құттықтау сөзінде ҚР көлік вице-министрі Жәнібек Тайжанов былай деп атап өтті: «Бүгінде еліміз Еуропа мен Азия арасындағы негізгі құрлық көпірі рөлін атқарады. Қазақстан өңірдегі басты транзиттік-логистикалық хаб мәртебесін сенімді түрде нығайтып келеді. Алдымызда ірі инфрақұрылымдық жобаларды іске асыру, үдерістерді цифрландыру және халықаралық дәліздерді әртараптандыру бойынша ауқымды міндеттер тұр. Биылғы іс-шараның ауқымын ерекше қуанышпен атап өткім келеді. Бүгін осы алаңға әлемнің 20 елінен компаниялар жиналды. Бұл Қазақстанның және жалпы өңірдің көлік әлеуетіне деген орасан зор халықаралық қызығушылықты көрсетеді. TransLogistica Kazakhstan көрмесі дәстүрлі түрде мемлекеттер, жетекші сарапшылар мен ірі бизнес үшін тиімді диалог алаңы болып келеді. Іс-шара аясында маңызды келісімдер жасалып, бүкіл саланың дамуына тың серпін беретін инновациялық шешімдер табылатынына сенімдімін». Салтанатты бөлім символдық лента қию рәсімімен аяқталды. Одан кейін құрметті қонақтар экспозициямен, қатысушы компаниялардың технологиялық әзірлемелерімен және салалық шешімдерімен танысты.

2026 жылы көрме 20 елдің 230 компаниясын біріктірді. Қазақстаннан 101 компания қатысса, халықаралық экспозицияда 129 компания ұсынылған. Қатысушылар географиясы Әзірбайжан, Беларусь, Германия, Грузия, Қазақстан, Қытай, Латвия, Литва, Люксембург, Нидерланд, Біріккен Араб Әмірліктері, Пәкістан, Ресей, Румыния, Түрікменстан, Түркия, Өзбекстан, Франция, Швейцария және Эстонияны қамтиды. Сонымен қатар көрмеде Ұлыбритания мен Қазақстанның, Германия мен Қазақстанның, Қытай мен Қазақстанның, Ресей мен Қазақстанның, Франция мен Қазақстанның, сондай-ақ Швейцария мен Қазақстанның бірлескен компаниялары ұсынылған.

Экспозицияда Қазақстан, Ресей және Қытай компаниялары ең көп ұсынылған. Беларусь, Латвия, Литва, Түркия және Эстонияның ұлттық топтары өз мемлекеттерінің көлік-логистикалық әлеуетін және трансшекаралық ынтымақтастықтың перспективалы бағыттарын таныстырып, халықаралық қатысуды нығайтуға елеулі үлес қосуда. Сонымен бірге көрмеге 35 экспонент алғаш рет қатысып отыр. Бұл нарықтың жаңа қатысушыларының іскерлік байланыстарды кеңейтуге және Орта Азия өңіріндегі орнын нығайтуға мүдделі екенін көрсетеді.

Халықаралық өзара іс-қимыл тұрғысынан Қазақстан Республикасында аккредиттелген дипломатиялық корпус өкілдерінің қатысуы ерекше маңызға ие. Көрмеге шақырылған қонақтар қатарында Алжир, Беларусь, Болгария, Мажарстан, Грузия, Ирак, Италия, Иордания, Куба, Латвия, Литва, Моңғолия, Біріккен Араб Әмірліктері, Оман, Словакия, Түркия, Чехия, Швейцария, Эстония және Жапония дипломатиялық миссияларының өкілдері бар. Шетелдік дипломатиялық мекемелердің қатысуы TransLogistica Kazakhstan көрмесінің мемлекетаралық экономикалық байланыстарды дамытуға, көліктік өзара байланыстылықты нығайтуға және екіжақты әрі көпжақты ынтымақтастық мүмкіндіктерін кеңейтуге ықпал ететін халықаралық коммуникациялық алаң ретіндегі маңызын айқындайды.

TransLogistica Kazakhstan 2026 көрмесінің экспозициялық бөлігі көлік-логистика кешенінің негізгі сегменттерін қамтиды. Қазақстан мен шет мемлекеттердің теңіз порттары, теміржолдары және арнайы экономикалық аймақтарының әкімшіліктері, көлік-логистика орталықтары, экспедиторлық және логистикалық компаниялар, автокөлік техникасын өндірушілер мен дилерлер, вагон жасау және жөндеу кәсіпорындары өз мүмкіндіктерін таныстыруда. Жеке бағыт логистикалық кешендерді жарақтандыруға арналған жабдықтарға, жүктерді өңдеу және қоймада сақтау технологияларына, сондай-ақ қойма инфрақұрылымын жаңғырту шешімдеріне арналған. Технологиялық сегментте өндірістік және логистикалық үдерістерді автоматтандыруға, жүйелік интеграцияға және көлік операцияларын цифрлық басқаруға арналған құралдарды ұсынатын бағдарламалық жасақтама әзірлеушілері, ғылыми және инновациялық компаниялар қатысуда. Салалық экспозицияны сақтандыру және консалтинг ұйымдары толықтырады.

Көрмеге 700-ден астам компанияны біріктіретін Түркияның қызметтер экспорттаушылары қауымдастығы алғаш рет қатысып отыр. Оның қатысуы қазақстандық және түркиялық кәсіпорындар арасындағы кәсіби байланыстарды кеңейтуге, халықаралық тасымалдарды дамытуға және көлік қызметтері саласындағы өзара іс-қимылды нығайтуға қосымша алғышарттар қалыптастырады. Тағы бір жаңалық – саланың жетекші көшбасшылары қатысатын «Әлемді алға жылжытатын адамдар» атты арнайы подкаст аймағы. Жаңа коммуникациялық формат кәсіби тәжірибе алмасуға, өзекті үрдістерді талқылауға және көлік-логистика секторын одан әрі дамытуға арналған стратегиялық тәсілдерді таныстыруға бағытталған.

Ауқымды экспозициямен қатар, іс-шара құрылымында халықаралық конференцияларды, сарапшылық пікірталастарды және кәсіби кездесулерді біріктіретін іскерлік бағдарлама маңызды орын алады. Көрменің алғашқы күні, 14 қазан, салалық көшбасшылыққа, көліктік өзара байланыстылықты нығайтуға, транзиттік әлеуетті дамытуға және өңірлік логистикалық бағыттардың бәсекеге қабілеттілігін арттыруға арналды.

Негізгі іс-шаралардың бірі – «Жаңа дәуірдің көшбасшы әйелдері: адамдар, технологиялар және көлік пен логистиканың болашағы» атты пленарлық сессия. Ол саланың қарқынды дамуы жағдайында кәсіби көшбасшылықтың, адами капиталдың және технологиялық өзгерістердің маңызын айқындады.

Бірінші күннің жеке бағыты бағдарламасы екі тақырыптық блоктан тұратын III BreakBulk Kazakhstan конференциясы болды. Іс-шара жобалық, ауыр салмақты және ірі габаритті жүк тасымалын ұйымдастыру, тиісті инфрақұрылымды дамыту және логистикалық операция тиімділігін арттыру мәселелері бойынша кәсіби өзара іс-қимылға арналған мамандандырылған алаң қалыптастырды.

Халықаралық күн тәртібін «Аваза іс-қимыл бағдарламасын іске асыруды ілгерілету: өзара байланыс пен бәсекеге қабілеттілікті арттыру үшін кәсіби және орнықты автокөлік саласын қалыптастыру» атты өңірлік диалог толықтырды. Оны Халықаралық автокөлік одағы (IRU) және БҰҰ-ның ең аз дамыған елдер, теңізге шыға алмайтын дамушы елдер және шағын аралдық дамушы мемлекеттер жөніндегі Жоғары өкілі басқармасы (UN-OHRLLS) Қазақстанның халықаралық автокөлік тасымалдаушылары қауымдастығымен (ҚазАТО) бірлесіп ұйымдастырды.

Іскерлік бағдарлама 15 қазанда Supply Chain Day тақырыптық күнімен жалғасады. Оның аясында екі блоктан тұратын Қазақстанның қойма логистикасы жөніндегі V конференциясы, OkLog кешенді жүйесінің таныстырылымы, сондай-ақ «New Silk Way» IX халықаралық көлік-логистикалық бизнес-форумы жоспарланған. Көрменің қорытынды күні, 16 қазан, Expert Talks «FUTURE CHECK: Қазақстан көлігі мен логистикасы 2035» форматында саланың ұзақ мерзімді перспективаларын сарапшылық талқылауға арналады.

Мемлекеттік сектор, халықаралық бизнес, кәсіби қауымдастықтар және сарапшылар қоғамдастығы өкілдерін біріктіретін TransLogistica Kazakhstan 2026 салалық диалогты дамытуда және заманауи көлік-логистикалық шешімдерді ілгерілетуде маңызды рөл атқарып келеді. Экспозицияның кешенді сипаты, қатысушылардың кең географиясы және мазмұнды іскерлік бағдарлама жаңа серіктестік қатынастар орнатуға, озық тәжірибе алмасуға және көлік инфрақұрылымын жетілдірудің бірлескен тәсілдерін әзірлеуге қолайлы жағдай жасайды. Көрменің өткізілуі Қазақстанның транзиттік әлеуетін одан әрі нығайтуға және халықаралық көлік-логистикалық байланыстар жүйесіндегі рөлін арттыруға ықпал етеді.

Көрмеге ресми қолдау көрсететіндер: Қазақстан Республикасының Көлік министрлігі, Астана қаласының әкімдігі, «Атамекен» Ұлттық кәсіпкерлер палатасы, «Қазақстан темір жолы» ҰК» АҚ, KAZLOGISTICS Қазақстан көлікшілері одағы, Қазақстанның тасымалдаушылар және вагон операторлары қауымдастығы, Қазақстандық жүк теміржол тасымалдаушылары қауымдастығы және Ұлттық экспедиторлар қауымдастығы.

Көрме серіктестері – тіркеу, фотоаймақ және кофе аймағының серіктесі WR LOGISTICS компаниясы, сондай-ақ шопер сөмкелерінің серіктесі Gradalogistic компаниясы.

Іс-шараны ұйымдастырушылар – қазақстандық Iteca және Атакент-Экспо көрме компаниялары, халықаралық серіктесі – ICA Events компаниялар тобымен бірлесіп.